Qalstuk haqqında nə bilirsiniz?

Roma İmperatorluğu dövründə cəmiyyətdə olan təbəqələrin nümayəndələrini bir-birindən fərqləndirmək üçün boyuna bağlanan rəngli parçalar XVII əsrdə başqa istiqamətdə istifadə olunmağa başlandı. İngilis dövlət adamı və siyasətçisi Oliver Kromvell boynuna bağladığı sadə bir ağ parçası ilə əsilzadələrə olan etirazını bildirdi.
Rəngi, forması, hətta düyünləmə biçimi dəyişsə də, qalstuk bu gün də onu taxan insanın həm xasiyyətini, həm cəmiyyətdə tutduğu mövqeyini göstərən bir atributdur.
Həqiqətən də qalstuk, sahibinin daxili dünyasına səyahət etmək üçün əla fürsətdir. Qalstukun rəngləri, biçimi və naxışları sahibi haqqında ətraflı məlumat verir.
Qalstukun bu xüsusiyyəti çoxdan kəşf olunub. Roma İmperatorluğu dövründə yalnız əsilzadələrin boyunlarına bağladıqları gözəl ipək parçalarına baxdıqda bu xüsusiyyət daha aydın görünür. O zamanlar boyuna bağlanan parça nə qədər enli və bəzəkli olardısa, sahibinin bir o qədər zəngin olduğunu bildirirdi.
Patrisilər ilə Plebeylər dövründən qalan, fərqin boyunlara bağlanan parçadan bilinməsi adətini XVII əsr İngiltərəsində Oliver Kromvell aradan götürmək fikrinə düşdü və balanslaşdırılmış bir qərar verdi.
Boyuna parça bağlanacaq, ancaq zənginlik simvolu olmayacaq. O günə qədər boynu çılpaq olanlar da adi bir parça bağlaya biləcək. Beləliklə, həm əsilzadələrə etiraz etdi, həm də adi insanlara qalstuk bağlamağa icazə verdi. Əslində qalstukun bizim günlərimizə qədər gəlib çıxmasına səbəbkar oldu.

Tərcümə etdi: Cambulat