"İnteraktiv" pullar buraxılıb
Hər ölkənin dövlət atributlarından biri olan özünə məxsus pulları var. Pulların üzərində ölkəyə məxsus mədəni, tarixi və incəsənət nümunələrinin təsvirləri yerləşdirilir. Onların dəyəri ölkənin iqtisadiyyatından asılıdır. Pulların və sikkələrin materialı da fərqli olur: kağız, qızıl, bürünc, platin, mis və s. Amma gündəlik dövriyyədə olan pullardan başqa, çox ölkələrdə hər hansı yubiley, tarixi hadisə və s. ilə əlaqədar sikkələr də buraxılır. Bəzən isə onlar tamamilə fərqli olur......
Lenta.ru-nun xəbər verdiyinə görə, Niderlandın kral zərbxanası 22 iyunda dünyada ilk "interaktiv" sikkələri buraxdı. İnteraktiv? Bəli. İdarənin saytında yerləşdirilmiş məlumata görə, yeni sikkələr zərbxananın yaradılmasının yüzillik yubileyi münasibətilə kəsilmişdir. Gümüşdən olan sikkələr 5 avro, qızıldan olanlar isə 10 avro dəyərindədirlər.
Sikkənin bir üzündə Niderlandın kraliçası Beatriksin təsviri həkk olunub, digərində isə - QR-kod (Quick Response). Kod ağ-qara kvadratlardan ibarət olub onu xüsusi oxuyucu proqram yerləşdirilmiş mobil telefon kamerasının köməyi ilə təyin etmək olar.
Yubiley sikkələrinin üzərində olan kodu oxuyan istifadəçilər yubileyin saytına yönəldiləcəklər, orada isə onları "sürpriz" gözləyir.
